Oarsoaldeko Hitza

Kaixo lagunok!
Etxe Berrietako bizilagunok afaria egiten dugu urtero, urrian. Bukatu zaigun urtean ez genuen egin, zoritxarrez, jende faltagatik. Baina, afariaren prestakuntzaren aitzakiarekin, auzoaren iraganari eta orainari buruzko bitxikeria eta hausnarketa ugari bururatu zitzaizkigun hainbat bizilagunoi. Hemen igortzen dizkizuegu, nahi izanez gero, argitaratzeko egunkarian:
Etxe Berrietako auzotarrok afaria egiten dugu urtero, urrian. Ohitura bihurtu da jada. 2007koa 14. aldia zen, baina, zoritxarrez, bertan behera gelditu zen, jende faltagatik. Nostalgia puntu batekin, lerro hauekin batera VII. afariaren argazkia eransten dugu; 1999. urtekoa da, Versalles jatetxean egindakoa.
Garrantzia historiakoa du irudiak; bai jatetxearengatik bai parte-hartzearengatik. Hainbat auzotar urrutitik ere etortzen ziren hitzordu honetara. Paristik, adibidez. Beste batean, berriz, izan zen ere AEBtik etorritakorik. Xey taldeko Xabin Olaskoagaren alaba izan hura, oporretan zegoena, eta auzoko Uranzu kalean bizi izan zena.
Esan bezala, azken urrian ez zen afaririk egin. Baina, afariaren prestakuntzaren aitzakian, auzoaren iraganaz eta egungo egoeraz hausnartzeko aukera izan genuen hainbat bizilagun. Zer esan, adibidez, maiatzaz geroztik auzoan ditugun obrei buruz. Baten batek Venezia gisa ere bataiatu zuen auzoa, kaleetan zehar egindako kanalak zirela eta!
Izan ere, auzo guztia hankaz gora izan dugu; egun batean bai, eta hurrengoan ere bai, ez genekien nondik ibili behar ote genuen etxetik irtetzean. Lagun batzuk ere erori izan dira, zorionez, aparteko larritasunik gabe.
Lanak bukatzear omen daude, eta emaitzaren zain gaude, jakin-minez. Egindako hobekuntzetaz gozatzea espero dugu denok, eta, adibidez, euria egitean edota kaleak urarekin garbitzean putzurik ez aurkitzea espaloi berrietan.
Adibidez, auzotar batzuek faltan bota dugu Gernika plazan zegoen plaka, bertan egindako azken berrikuntzen ondotik desagerturikoa. Kioskoaren aurrean zegoen baldosa ziztrin bat balitz bezala kendu zuten. Plazari izena ematen zion, eta deitura nondik zetorren gogorarazi: 1987an hartu zuen erabakia Udalbatzak, Gernikako bonbardaketaren 50. urtemugarekin bat eginez. Inaugurazio egun hartan, herriko musika bandak kontzertua eman zuen plazako kioskoan, ondoren berriz ere erabili ez zena…
Ez legoke gaizki bandak berriro kontzertua ematea Gernika plazan, gaur egungo obrak bukatzean. 2008an obrak ondo bukatzea espero baitugu, eta auzotarrak 2008ko urriko afariarekin bat egitea.