Oarsoaldeko Hitza

Maria Lezoko tabernek jaietako ekimenak antolatu dituzte

Jaiak Madalen jaietan, 21etik 24ra, musika ardatz izango duten ekimenak antolatu dituzte kaleko lau tabernek

urko etxebeste

Maria Lezo kaleko lau tabernek madalenetarako egitaraua antolatu dute. Musika kontzertuak izango dira egitarauaren ardatza, baina bestelako jarduerak ere izango dira. Kale horretako Landare, Maiaritz, Aker eta Aratz tabernek antolatu dituzte hilaren 21etik 24ra egingo diren ekimenak.

«Maria Lezo kalearen ingurua jaiaren beste gune bat izan dadila nahi dugu. Izan ere, azken urteetan toki gutxi batzutara murriztuz joan dira madalenetako jai-guneak. Adibidez, Xenpelar plazan egiten ziren ekimen asko ez dira egiten jada. Horregatik erabaki dugu kaleari bizitza ematea», azaldu du Aritz Maziziorrek, ekimenen antolatzaileetakoak. Aldi berean, Errenteriako Udalak «Niessen merkataritza gunera ekimenak bideratzen» dituela adierazi du Maziziorrek, «eta horren alternatiba izan nahi dugu».

Aurten, kamioian

Joan den urteko madalenetan bi eguneko egitaraua antolatu zuten Maria Lezo kaleko tabernek. Aurten, lau eguneko apustua egin dute. «Iazkoa ondo atera zela ikusita, aurten, lau egunera joan gara. Egia esateko, daudenak baino ekimen gehiago antolatu nahi genituen, baina Udalaren diru laguntza ez da horretarako nahikoa izan», nabarmendu du Maziziorrek. Hartara, kontzertuak kamioi batean egingo direla jakitera eman dute antolatzaileek.