Oarsoaldeko Hitza

Bakailao Pintxoen Aste Nagusia egingo dute lehen aldiz etzitik aurrera

GizarteaHerriko hamaika tabernek parte hartuko dute, eta bakoitzak pintxo bana egingo du bakailaoa oinarritzat hartuta

jon gonzalo

Errenteria-Oreretako tabernariek ekimen aintzindaria jarriko dute martxan datorren astean: Bakailao Pintxoen Aste Nagusia. Herriko hamaika tabernek parte hartuko dute ekimenean, eta bakoitzak pintxo bana egingo du bakailaoa oinarritzat hartuta.

Etzitik hilaren 13ra arteko astean parte hartuko duten tabernen zerrenda honako hau da: Maite; Aikar; Leku Zaharra; Kasikesi; Juli; La Cepa; Zuketz; Batzoki; Txikote; Buxan eta Lapiko.

«Gipuzkoako Pintxo Lehiaketan herriko zenbait tabernari elkartu ginen. Maila ona genuela ikusi genuen, eta herrian aste honen antzeko zerbait antolatu behar zela erabaki genuen», azaldu zuen atzoko agerraldian La Cepa tabernako arduradunak.

Herritarrentzako sariak

Bakailao Pintxoen Aste Nagusian parte hartzen duten herritarrentzako hainbat sari prestatu dituzte antolatzaileek , besteak beste, bi lagunentzako 10 afari, Paterninako Upeldegiak bisitatzeko 50 bidai, dozenaka ardo botila eta San Ferminetako hainbat kamiseta.

Hori bai, zozketa hauetan parte hartzeko tabernetako pintxoei nota jarri beharko diete herritarrek. «Eskuorri bat prestatu dugu. Bertan herritar bakoitzak probatu berri duen pintxoari nota jartzeko aukera izango du (1, 2 edo 3). Aste Nagusia bukatzen denean pintxo irabazlearen izena jakinaraziko dugu», azaldu zuten atzoko agerraldian

Bideo emanaldia

Bakailao Pintxoen Aste Nagusiko ekitaldiak borobiltzeko bideo emanaldia prestatu dute antolatzaileek, La Bacaladera enpresaren laguntzarekin.

Ostegunean, 19:30ean, izango da emanaldia Reina aretoan. Groenlandiako bakailao arrantzari buruzko dokumental «interesgarri» bat jarriko dute.

############

pintxoen zerrenda

Bar Maite. Bakailao konfitatua nekora kremarekin.

BarAikar. Bakailao ajoarrieroa.

Leku Zaharra. Bakailaoa txakoliarekin.

Kasikesi. Bakailaoa tipula kremarekin.

BarJuli. Bakailaoa alioli eta laranjarekin.

Bar La Cepa. Itsas-lur bakailaoa.

Zuketz. Bakailaoa sarean.

Batzoki. Gaurko zurrukutuna

Txikote. Bakailao kanpesinoa. Buxan. Mencia bakailaoa.

Lapiko. Lapiko bakailaoa

############