Oarsoaldeko Hitza

2008-05-16 | 12:39:45

Sabecoko langileek euren lan baldintzak salatu dituzte

Elkarretaratzea egin dute Niessen merkataritza gunean

ELA eta LAB sindikatuek deituta elkarretaratzea egin dute Niessen merkataritza gunean Sabecoko langileek. Euren lan baldintzak salatu dituzte, «batez ere emakumezkoenak», salatu dutenez. Lan baldintzak hobetu ezean, protestekin jarraituko dutela iragarri dute sindikatuek.

Ez du erantzunik

2008-05-15 | 15:20:15

ETAren azken atentatua salatzeko bilkura

140 lagun inguru bildu dira Herriko Enparantzan

Gaur 12:00etan ETAk Legution egindako azken atentatua salatzeko elkarretaratzea egin da Herriko Enparantzan Bozeramaleen Batzordeak deituta. 140 lagun inguru bildu dira bertan, eta 15 minutuko ixilunea ondoren, txalo zaparrada bat eskaini diote Juan Manuel Piñuel Guardia Zibilari. Elkarretaratzean Errenteriako Udala osatzen duten alderdietako ordezkari guztiek hartu dute parte, EAE-ANV alderdiko ordezkariak ez beste.

Ez du erantzunik

2008-05-14 | 15:54:47

Bozeramaileen Batzordeak Legutioko atentatua gaitzesi du

Juan Manuel Piñuel Guardia Zibila hil dutela salatzeko elkarretaratzera deitu dituzte herritarrak, bihar, 12:00etan, Herriko Plazan

Errenteriako Udaleko Bozeramaileen Batzordeak bilera egin du eta gaur goizaldean, Legutioko Guardia Zibilaren koartelaren kontra ETAk egindako atentatua gaitzesteko oharra adostu dute PSE-EEk, EAJk, PPk, EB-Berdeek eta EAk. EAE-ANVk abstentziora jo du. Legutioko atentatuan Juan Manuel Piñuel Guardia Zibila hil da, eta beste lau zauriturik gertatu dira. «Edozein herritarren kontra atentatua egiten duenak, euskal gizarte guztiaren kontra egiten du atentatua», esan dute. Atentatua gaitzesteko eta hildakoaren sendiari elkartasuna adierazteko elkarretaratze ixilera deitu ditu herritarrak Bozeramaileen Batzordeak, bihar, 12:00etatik aurrera, Herriko Plazan.

Erantzun 1

2008-05-10 | 13:08:08

Pirritx eta Porrotxen saio arrakastatsua

EHBEk antolatutako ekitaldian Galtzarabordako kiroldegia txiki utzi dute haur eta gurasoek

Pirritx eta Porrotxen emanaldiak hezkuntza sistema nazionala aldarrikatzeko ekimenei amaiera eman die. Aste guztian Euskal Herriak Bere Eskola (EHBE) taldeak ekintza ugari antolatu ditu; hezkuntza sistema nazionalaren inguruko tailerra, hezkuntzaren historia Euskal Herrian erakusketa, Marcos Nanclaresek hitzaldia, sinadura bilketa...

Erantzun 1

2008-05-09 | 12:34:58

Lore ornamentalen eta landareen bigarren azoka egingo da bihar

Euskal Herriko zazpi herritako zortzi lore eta landare ekoizle egon dira bertan

Geranioak, begoniak, petuniak, alegriak... udaberri giro koloretsua hartuko du bihar herriak Lore ornamentalen eta landareeen bigarren azoka dela eta. Azoka Behemendi Elkarteak antolatu du Errenteriako Udalaren laguntzarekin. Antolatzaileen hitzetan ekimen honen helburua «baserriko produktuen salmenta sustatzea da». Iazko lehen aldiak izan zuen arrakasta ikusita, aurten ere azoka herrira ekartzea pentsatu dute Behemendi eta Udalak. 09:00etan zabalduko da azoka, eta 14:00ak arte egongo da zabalik. Xabier Olaskoaga plazan egongo dira sektoreko Gipuzkoako ekoizle onenen salmenta postuak. Aurten, berritasun bezala Bizkaiko baserritar bat ere etorriko da bere landare eta loreekin. Guztira lorez jositako 144 metro koadro izango dira ikusgai.

Ez du erantzunik

2008-05-08 | 13:40:10

Etzi hasiko da Musikasteren 36. aldia

Hiru konpositoreren lanak goraipatuko dituzte aurten; Pablo Sarasate, Jose Maria Gonzalez Bastida eta Jose Luis Iturralde

Musikasteren 36. aldia hasiko da etzi Errenteria-Oreretan, eta maiatzaren 17ra arte luzatuko da. Egitarau oparoa antolatu dute urtero legez. 1973 urteaz geroztik, Jose Luis Ansorenak sortu zuenetik, antolatzen dute Eresbilek (Euskal ereslarien bilduma) eta Andra Mari koralak Musikaste-Euskal Musikaren Astea, elkarlanean. Hastapenetatik izan duten lan ildoei jarraiki, iraganeko musikagileen lanak berreskuratu eta ezagutzera ematea da, eta halaber, musika garaikidearen sorkuntzari auspoa ematea. Musikasteren ezaugarrietako bat mendeurrena betetzen duten musikagileak gogora ekartzea da. Aurten euren jaiotzaren edo heriotzaren mendeurrena betetzen duten hamalau musikagileen artean, Pablo Sarasate biolinista nafarra, Jose Maria Gonzalez Bastida musika banda profesionalen zuzendaria eta Jose Luis Iturralde Donostiako Kontserbatorioan iraksle eta musikagilea gogoratu ditu bereziki.

Ez du erantzunik

2008-05-08 | 13:22:05

Bizikletaren Festan 450 haur baino gehiagok parte hartuko dute, etzi

Errenteriako Udalak eta Laguntasuna Elkarteak antolatutako ekimena Fanderian izango da, 10:15etik aurrera

Bizikletaren Festan eskualdeko 450 haur baino gehiagok parte hartuko dute, etzi goizean (10:15ean hasiko da). «Orain arte 450 lagunek eman dute izena, baina lasterketa hasi aurretik ohikoa da beste zenbait apuntatzea», azaldu du Jesus Mari Erzibengoa Kirol Patronatuko ordezkariak. Ikasleen artean txirrindularitza sustatzea helburutzat duen ekimen honetan Oarsoaldeko 12 ikastetxeetako haurrek parte hartuko dute (Telleri, Langaitz, Gamon, Orereta, Gurutzeko Alabak, Beraun Berri, Koldo Mitxelena, Lezo Herri Eskola, Elizalde, Haurtzaro Karmengo Ama eta Pasaia-Lezo Lizeoa).

Ez du erantzunik

2008-05-07 | 16:50:59

Munduko Kopan parte hartuko du Mikel Odriozolak, igandean

Errusiako Cheboksary herrian jokatuko da 50 kilometro ibilketako Munduko Kopako lasterketa

Mikel Odriozola herriko atletak datorren igandean jokatuko den Munduko Kopako ibilketako proban parte hartuko du. Errusiako Cheboksary herrian jokatuko da lasterketa, eta atletek 50 kilometroko ibilbidea osatu beharko dute. 55 herrialdetako ehunka atletek parte hartuko dute igandeko proban, eta denek Beinjingo Olinpiar Jokoetarako txartelak izango dituzte jokoan. «Ofizialki ez bada ere, Espainiako Federaziokoek Olinpiar Jokoetan parte hartzeko plaza bat gordeko zidatela esan zidaten, baina , hala ere, ez dut gehiegi lasaitu nahi. Ahalik eta postu onena lortzen saiatuko naiz», azpimarratu du Mikel Odriozolak.

Ez du erantzunik